Серафим Попов "Сталинградскöй баллада"

1. Коркö волан кö Волгалань тэ, -

Пöся окышт тась ранитчöм мусö,
Кöнi Миша Шуктöмовлöн кусi
Кодзув югöр моз дзирдыштöштöм нэм;
Копырт юртö да пидзöс выв сувт
Братск гу бердö öти здук чöла,
Мед салдатлысь палявтöм ун
Оз нин торк весиг котыртысь тöлыс...

Сiйö ми дiнö мöдысь оз лок
Да оз аддзы чудеснöй творенье,
Кыдзи Волгакöд сывъясис Дон
Сэнi, пуис кöн коркö сраженье.

Но быд дзоридз, быд веж турун сi
Кутас казьтывны нимсö салдатлысь,
Кодi олöмсö сiдзи зэ видз,
Кыдзи видзис быд из Сталинградлысь.

2... Дас квайтгвардеецлы сиöм висьт
Сьöлöмын пессьö мед.
Дас квайтöн шуисны:
- Враг оз письт,
Лов кытчöдз миян эм...
Танкъяслöн сталь улын ойзiс му,
Тiралiс вöр и ва.
Клятва моз шуисны быдöн:
- Кув,
Но Сталинград эн сдайт!
Дас öти русскöйяс: дас салдат
Да лейтентан Чирков,
Кык украинец да кык казах,
Комиысь öти зон...
Эм öмöй му вылас сэтшöм вын,
Торйöдас найöс код?
Сувтiс гвардеец:
- Со... бара тшын...
- Бара нин... -
Шуис взвод.
Ӧтилöн - ранаяс, мöдлöн - вир
Войт бöрся киссьö войт:
Дьявольскöй крестъяса дас вит "тигр"
Панiсны смертнöй бой.
Ышловзис öти:
-Салдатскöй труд
Весьшöрö мед оз вош...
Мöд сэтчö содтыштiс:
- Чужан му
Некор эн вунöд, зон...
- Эм ылi войвылын Коми край, - 
Шуис Шуктомов. - Эм...
Мед эськö тöдiс жö муса мам,
Мый пыр на ловъя ме...
Сэн менам томлунöй... шудöй сэн...
Пожöглöй эзысь ва.
Сюрс километр сайысь локтi ме
Пöдтыны тась война.
- Киев ме эновтi... - содтiс мöд.-
Доймытöдз öнi жаль
Думайтны: воöм фашистскöй сброд
Талялö чужан кар...
- Алма - Ата весьтын öнi лöнь...
Ӧзйис казахлöн син:
- Дас квайтöн сулалам öнi кöн, - 
Миян сэн чужанiн...
(юкöн)